Ika-walo Nga Semanang Talaan (8)

Karong semanaha, nabati nasad nako ang kabog-at sa mga buhatonon sa eskwelahan. Daghan kaayo nga hapit na ko magkayamukat, labi na nga nagtinapol ko ug wa nako gidali-dali og buhat ang tanan. Wa ma’y bag-o anang bahina. Maayo sad ko sah?

Gawas ana, ang nakapanindot gamay sa akong semana mao kini: naghimo og album ang banda nga Kenosis ug akong namatikdan ang proseso sa paggama sa gihisgutang album sa recording studio. Karaan na ni sila nga banda. Apil aning banda mao ang uban nga miyembro sa banda nga Souls Harbor, nga sa una apil sa kaniadtong gitawag nga Local Ground nga music scene sa Sugbu. Ang “Our Land” nga kanta sa Souls Harbor misikat sa katong panahon nga milusob ang bagyo nga ginganlan og Roping. Kini nagsilbing ispirasyon sa mga tawo. Unsa’y labot nako nila ug aning tanan? Papa nako ang bahista ug ang uban miyembro paryente ra sad nako. Ug, interesado sad kaayo ko og sound engineering mao na ganahan jud kaayo ko mutan-aw kung unsaon.

Lima Ka Bag-ong Sugbuanong Pulong (14)

1. gutlo (minute) – Pila nalang ka gutlo ang nahabilin?
2. tunglo (curse) – Ang tunglo sa among pamilya wa pa gyud mihawa.
3. kahaw-ang (emptiness) – Ang Ginoo ra ang makatagbaw sa kahaw-ang sa akong kasingkasing.
4. kuyanap (scatter) – Paspas kaayo mikuyanap ang “chismis”.
5. pag-amoma (care) – Maayo kaayo ang pag-amoma niya sa mga bata.

Ang Labing Bantugan nga Sugbuanon Para Nako

Pakighisgot ni Ms. Lilia Tio

Ika-pito Nga Semanang Talaan (7)

Taas-taas gamay among bakasyon pagkahuman sa kapoy apan lingaw nga intrams namo tungod Lunes ug Martes wala’y klase. Hayahay kaayo ko dili tungod wa ko’y gibuhat kon dili, wa ko naghunahuna sa mga buhatonon. Mao ni ang sekreto sa pagpahuway. Ayaw ipa-idlom ang kabog-at sa kalibutan.

Kon pangutan-on ko bahin sa unsa akong gibuhat gikan Sabado hangtod Martes, ang itubag nako mao kini: nagbansaybansay ko og kamatay. Nagpahimus ko sa panahon nga gihatag nako para makaginhawa, mao na wa ko’y gibuhat. Halos wa na ko’y panahon para sa akong kaugalingon. Mao ra to’ng panahona alang sa kaayohan nako.

Hapit na ko mahutdan og pulong; wala na ko’y maambit ninyo. Mao ra to para karon. Salamat.

Lima Ka Bag-ong Sugbuanong Pulong (13)

1. magdumala (lead) – Ako ang magdumala ninyo karon.
2. pasidunggi (recognize; acknowledge) – Pasidunggi ang mga kabos.
3. kabos (poor) – Ang mga kabos ang angay hatagan og pagtagad.
4. ipabuhagay (express) – Ipabuhagay ang imong ngil-ad nga gibati.
5. sud-onga (ponder; look into) – Sud-onga imong kaugmaon.

Ika-unom Nga Semanang Talaan (6)

Intramurals namo sa STC kaniadtong Huwebes, Biyernes, ug Sabado (Sept. 4-6). Bisan dili ko player, busy gihapon ko tungod ako ang tigtukar sa music nga mao’y madunggan sa tanan tawo. Halos wala ko’y hawa-hawa sa akong puwesto kay wala ko’y puli. Tibuok adlaw maglingkod ra ko. Abi ninyo sayon pero dili jud lalim.

Gawas sa mga dula, daghan pa kaayo’g nahitabo. Grabe ang drama katong pagluwat (forfeit) sa TCO (Theresian Communicators’ Organization) kontra sa BAT (Business & Accountancy Team) sa dula nga soccer baseball tungod naa’y usa nga player sa TCO nga wala naapil sa official list of players. Para nako dili to sala sa TCO. Naa ko’y nahibaw-an nga dili nalang nako isuwat kay taas na kaayo. Apan sa wala pa naluwat ang TCO, mas dako ilang puntos kontra sa BAT. Gipugos gyud sa BAT nga maluwat ang TCO. Nahitabo gyud ug lipay jud kaayo sila. Mao ni ang rason sa di maayo nga reaksyon sa tigbansay (coach) sa TCO. Kasuko ug luha akong nakita niya. Hasta uban sa mga players nanghilak sad. Guol jud kaayo sila tanan.

Lima Ka Bag-ong Sugbuanong Pulong (12)

1. abay (bridesmaid) – Mas gwapa ang abay kontra sa pangasaw-onon.
2. sidlakan (east) – Ang among balay makit-an sa sidlakan sa imong gitindugan.
3. isigkatawo (fellowman) – Dapat e-respeto nato atong isigkatawo.
4. madalidalion (impulsive) – Madalidalion siya basta mga sinina na ang isturyaan.
5. tigpaluyo (supporter) – Hinaot unta nga mahimo ta’g tigpaluyo sa presidente.